Lladrad yn nhŷ Garry Monk

Image copyright Huw Evans picture agency

Image caption Cafodd yr eiddo ei ddwyn o gartref Garry Monk yn Abertawe

Mae Heddlu De Cymru'n apelio am wybodaeth yn dilyn lladrad yn nhŷ'r pêl-droediwr Garry Monk.

Cafodd nifer helaeth o bethau eu dwyn o gartref cyn gapten yr Elyrch gan gynnwys mwy nag un oriawr, gemwaith, offer cyfrifiadurol, ffonau symudol a bag chwaraeon gyda'i enw a'r rhif 16 arno.

16 yw rhif carfan Monk gydag Abertawe.

Mae'r heddlu'n credu i'r lladrad ddigwydd rhwng 9yb ddydd Gwener 15 Tachwedd a 2.45yh y dydd Llun canlynol.

Dywedodd y ditectif arolygydd Darren George o Adran Ymchwiliadau Troseddol Abertawe: "Rydym yn apelio i unrhyw un welodd ymwelwyr ar yr eiddo ddydd Gwener neu dros y penwythnos neu a welodd neu a glywodd rhywbeth amheus i ddweud wrthon ni.

"Fe wnaeth Garry a'i deulu golli llawer o eiddo oedd o werth sentimental mawr iddyn nhw yn dilyn y lladrad."

Gall unrhyw un sydd â gwybodaeth allai fod o fudd i'r heddlu gysylltu â nhw ar 101 neu ar Taclo'r Tacle'n ddienw ar 0800 555 111.