Casnewydd 1-0 Braintree

  • 20 Tachwedd 2013
Clwb Pêl-droed Casnewydd Image copyright Other

Casnewydd 1-0 Braintree

Roedd cic rydd hyfryd Robbie Willmott yn yr hanner cyntaf yn ddigon i sicrhau lle Casnewydd yn ail rownd Cwpan FA Lloegr.

Teithiodd Braintree i Rodney Parade am y gêm ail chwarae yn dilyn y gêm gyfartal naw diwrnod yn ôl.

Aeth ergyd wych Willmott i gornel ucha'r rhwyd ychydig cyn yr egwyl.

Roedd y canlyniad yn adlewyrchu'r chwarae gan i Gasnewydd gael mwy o'r meddiant gydol y gêm.

Er hynny aeth cyfle gorau'r gêm i'r ymwelwyr, ond fe wastraffodd Matt Paine y cyfle gwych o chwe llath pan oedd hi'n ddi-sgôr.

Bu ond y dim i Adam Chapman ddyblu'r fantais gydag ergyd a orfododd arbediad campus gan Nick Hamann.

Fe fydd Casnewydd yn wynebu Kidderminster Harriers oddi cartref yn ail rownd y gystadleuaeth.