Ambiwlansys yn methu targed 999 eto

Ambiwlansys
Image caption Mis Hydref oedd y tro cyntaf i'r gwasanaeth ambiwlans gyrraedd targed ymateb i'r galwadau mwyaf brys ers Mai 2012

Mae Gwasanaeth Ambiwlans Cymru wedi methu targed ymateb i 65% o'r galwadau mwyaf brys o fewn wyth munud a hynny am y 17fed tro mewn 18 mis.

Roedd y ffigwr ym mis Tachwedd yn 63.2%. 65.2% oedd y ffigwr ym mis Hydref, sef y tro cyntaf i'r gwasanaeth gyrraedd y nod ers Mai 2012.

Mae Ceidwadwyr Cymru wedi dweud bod ffigwr Hydref yn ymddangos yn enghraifft ynysig.

Mae disgwyl i Lywodraeth Cymru ymateb i'r ffigyrau diweddaraf maes o law.

Yn ôl ffigyrau diweddaraf Ystadegau Cymru, fe gafodd 68.6% o alwadau bygythiad i fywyd ymateb o fewn naw munud, 87.7% o fewn 15 munud a 94.2% o fewn 20 munud yn ystod mis Tachwedd.

Yn waeth

Roedd y ffigyrau yna hefyd yn waeth nag ym mis Hydref.

Dywedodd lelfarydd y Ceidwadwyr ar iechyd, Darren Millar AC: "Yn anffodus, mae'r manylion yn dangos amseroedd ymateb sy'n methu'r targedau ac mae ffigwr Hydref yn ymddangos fel 'blip'.

"Wedi 18 mis o fethiant fe wnaeth Carwyn Jones a Llafur Cymru glodfori'r ffigyrau diwethaf.

"Heddiw rwy'n disgwyl iddyn nhw ymddiheuro a sicrhau gwelliannau ar frys.

"Gyda'r potensial am dywydd llawer oerach dros yr wythnos i ddod, mae'r dirywiad mewn perfformiad yn bryderus iawn."

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.