Cadarnhad bod Leigh Halfpenny yn gadael Gleision Caerdydd

Leigh Halfpenny Image copyright Getty Images
Image caption Y gred ydi y gall dderbyn yn agos at £400,000 y tymor gyda Toulon.

Fe ddaeth cadarnhad y bydd cefnwr Cymru, Leigh Halfpenny, yn gadael Gleision Caerdydd ar ddiwedd y tymor.

Cafodd seren y Llewod ei enwi'n Chwaraewr y Gyfres wedi'r daith lwyddiannus yr haf diwethaf.

Roedd yn Chwaraewr y Bencampwriaeth yn y Chwe Gwlad ym mis Mawrth ac mae wedi ennill Personoliaeth Chwaraeon y Flwyddyn BBC Cymru.

Daeth yn ail i bencampwr Wimbledon, Andy Murray, yng ngwobr Personoliaeth Chwaraeon y Flwyddyn y BBC.

Mi fydd Halfpenny, sy'n dod o Orseinon ger Abertawe, yn nhîm Cymru ym Mhencampwriaeth y Chwe Gwlad yr wythnos nesaf.

Sawl cynnig

Oherwydd ei lwyddiant a'i boblogrwydd mae wedi cael cynnig cytundeb newydd gan ei glwb rhanbarthol, Gleision Caerdydd, yn ogystal â chytundeb canolog gan Undeb Rygbi Cymru.

Fel yn achos ei gyd-chwaraewyr yng ngharfan Cymru, Jamie Roberts, Mike Phillips, Dan Lydiate, James Hook a Luke Charteris, mae'r arian mawr a chynghrair proffil uchel yn Ffrainc yn dipyn o dynfa.

Y gred ydi y gall ennill yn agos at £400,000 y tymor gyda Toulon.

Mae'r clwb yn chwilio am rywun i gymryd lle Jonny Wilkinson.

Mae Halfpenny yn cael ei ystyried yn un o'r cefnwyr gorau yn y byd am iddo sgorio 344 o bwyntiau i Gymru mewn 48 o gemau ers ei ymddangosiad cyntaf yn 2008.