Evans wedi ei wahardd o'r Chwe Gwlad

Roedd Evans yn wynebu panel disgyblu ar ôl derbyn cerdyn coch am sathru ar wyneb chwaraewr arall.

Fe fydd clo Cymru a'r Llewod, Ian Evans, allan o Bencampwriaeth y Chwe Gwlad, wedi iddo gael ei wahardd rhag chwarae am 12 wythnos.

Roedd Evans yn wynebu panel disgyblu annibynnol yn Nulyn yn sgil digwyddiad yn y gêm rhwng y Gweilch a Leinster nos Wener ddiwethaf.

Fe gafodd Ian Evans gerdyn coch am sathru ar chwaraewr arall.

Penderfynodd y dyfarnwr, Romain Poite, ei yrru o'r maes ar ôl gweld lluniau teledu o'r digwyddiad a adawodd Mike McCarthy gyda gwaed dros ei wyneb.

Roedd hyd cosb Evans yn dibynnu ar ddehongliad y panel disgyblu o'r digwyddiad, ac fe allai fod wedi wynebu 2 wythnos am achos bychan, 5 wythnos am achos canolig ac unrhywbeth rhwng 9 a 52 wythnos am yr achosion mwyaf difrifol.

Bu'r swyddog barnwrol annibynnol, Jeremy Summers o Loegr, yn gwrando ar dystiolaeth gan Evans, oedd wedi pledio'n euog, rheolwr tîm y Gwleich, Andy Lloyd, a Swyddog Disgyblu yr ERC (European Rugby Cup).

Nododd y Swyddog Disgyblu bod yr achos wedi cynnwys o leiaf dau sathriad ar ben McCarthy arweiniodd at anaf difrifol i'w wyneb.

Dywedodd Mr Summers nad oedd lle yn y gêm i ymddygiad fel hyn, ac roedd Evans ei hun yn derbyn hynny yn ystod y gwrandawiad.

Fe benderfynodd bod y cyhuddiad ym mhen uchaf cosbau'r IRB am achosion o'r math yma ac y byddai 16 wythnos yn addas, ond fe gwtogodd y gosb o bedair wythnos yn sgil ple euog y chwaraewr, ei ymddygiad da a'i edifeirwch yn ystod y gwrandawiad.

Fe fydd Evans yn rhydd i chwarae o Ebrill 21 ymlaen, ond mae gan y chwaraewr a'r ERC yr hawl i apelio'r penderfyniad.

Mae hyn yn golygu na fydd clo Cymru yn gallu chwarae ym Mhencampwriaeth y Chwe Gwlad.

Mae Evans wedi ennill 32 cap i Gymru yn yr ail reng.

Gyda chyhoeddiad ddydd Llun na fydd Ryan Jones ar gael ar gyfer y bencampwriaeth, roedd un o ddewisiadau posib Warren Gatland yn y safle hwnnw eisoes wedi diflannu.

Fe fydd yn rhaid i Gatland rwan ystyried dewisiadau eraill.