Geraint Thomas yn drydydd Down Under

Mae Geraint Thomas yn drydydd ar ddiwedd y Tour Down Under yn Awstralia.

Tom-Jelte Slagter oedd yn fuddugol, gyda Javier Moreno 17 eiliad y tu ôl iddo, a Thomas 25 eiliad ar ôl yr enillydd.

Roedd y Cymro ar y blaen wedi'r pedwerydd cymal ond disgynnodd i'r pumed safle wedi'r pumed cymal.

"Roedd hi'n siomedig ddoe ond roedd un diwrnod arall i fynd ac roedd cyfle i fod yn drydydd," meddai.

'Eitha' llwyddiannus'

"Roedd y bois yn y tîm yn wych eto - cawson ni ddiwrnod perffaith ac mae wedi bod yn wythnos eithaf llwyddiannus.

"Roeddwn i wedi siomi ddoe ond cyn dechrau'r ras, byddwn i wedi bod yn hapus iawn i ennill cymal."

Aeth Slagter i'r brig wedi iddo orffen yn ail y tu ôl i Simon Gerrans ar y pumed cymal ddydd Sadwrn.

Llwyddodd i gadw ar y blaen ar y cymal olaf - 50 milltir drwy Adelaide - i orffen gydag amser o 18 awr 28 munud a 32 eiliad.

1. Tom-Jelte Slagter (Blanco) 18:28:32"

2. Javier Moreno (Movistar) +17"

3. Geraint Thomas (Team Sky) +25"