Mathew Rees yn ymarfer eto wedi triniaeth canser

Dywedodd Rees fod 'pwysau mawr wedi diflannu'

Mae apten y Gleision, Matthew Rees yn cael dychwelyd i hyfforddi yn llawn amser wedi triniaeth am ganser.

Nid yw bachwr Cymru wedi chwarae ers mis Hydref oherwydd triniaeth am ganser y ceilliau.

Mae Rees wedi cael gwybod gan arbenigwyr nad oes angen triniaeth bellach arno.

"Dyma'r newyddion roeddwn i am ei glywed," meddai.

"Nawr bod dim problem galla i ganolbwyntio ar fy ffitrwydd a gobeithio chwarae fy rhan i'r Gleision.

"Mae pwysau mawr wedi diflannu.

"Dwi wedi cael fy syfrdanu oherwydd yr holl negeseuon gan y byd rygbi a chefnogaeth wych ffrindiau, teulu, cyd-chwaraewyr a staff y Gleision ac URC drwy gydol fy nhriniaeth.

"Mae wedi golygu cymaint i mi."

Llewod

Cafodd Rees, ymunodd â'r Gleision o'r Scarlets yn yr haf, driniaeth yng Nghanolfan Canser Felindre yng Nghaerdydd.

Chwaraeodd y bachwr 33 oed i Gymru am y tro cyntaf yn 2005 ac roedd yn nhîm y Llewod aeth i Dde Affrica yn 2009.

Roedd yn gapten Cymru ym Mhencampwriaeth y Chwe Gwlad yn 2011 ond methodd Gwpan y Byd yn ddiweddarach y flwyddyn honno gydag anaf.

Dywedodd cyfarwyddwr rygbi'r Gleision, Phil Davies: "Rydym wrth ein boddau bod Matthew wedi dod trwy'r holl driniaeth.

"Mae wedi dangos gwydnwch rhyfeddol trwy'r amser caled.

"Does yna ddim llawer o bobl sydd wedi mynd trwy hyn a bod mor bositif a phenderfynol.

"Nawr rydym yn edrych ymlaen at ei weld yn ymarfer ar y cae ac yn gwisgo crys y Gleision unwaith eto."