Chwe Gwlad: George North yn y canol?

George North Image copyright Huw Evans picture agency
Image caption Gallai George North symud i'r canol a Liam Williams chwarae ar yr asgell

Mae cyn fewnwr Cymru a'r Llewod Robert Jones yn credu y gallai Warren Gatland ddewis George North yn y canol i Gymru yn erbyn Ffrainc gan na fydd Jonathan Davies yn holliach.

Nid yw Davies wedi chwarae ym mhencampwriaeth y Chwe Gwlad eto eleni, ac mae Scott Williams allan o'r bencampwriaeth ar ôl anafu ei ysgwydd yn erbyn Iwerddon.

Symudodd North i'r canol pan adawodd Williams y maes yn Nulyn, ac yn ôl Jones fe allai aros yno.

"Rwy'n credu y bydd e (Gatland) yn dewis George North."

Yn ôl rhai adroddiadau mae amheuaeth a fydd canolwr grymus y Ffrancwyr, Mathieu Bastareaud, ar gael ar ôl anafu ei ysgwydd wrth chwarae i Toulon yn erbyn Castres dros y penwythnos.

Fe fydd hynny'n sicr yn lleihau grym y Ffrancwyr yn y canol tra bod Cymru'n debyg o gryfhau os fydd Davies neu North yn bartner i Jamie Roberts.

"Dydw i ddim yn credu y bydd Bastareaud ar gael oherwydd anaf," meddai Jones.

"Bydd Ffrainc ychydig yn fwy bregus a ddim mor rymus yng nghanol cae, ac rwy'n credu bydd Gatland yn glynu at ei gynllun drwy ddefnyddio pwer i lawr y canol a dod â Liam Williams i mewn ar yr asgell."

Chwaraeodd Jonathan Davies, a gafodd anaf wrth chwarae yn erbyn De Affrica ym mis Tachwedd y llynedd, am y tro cyntaf ers hynny dros y Scarlets yn erbyn London Irish ar Chwefror 1.

Daeth yn syth yn ôl i mewn i garfan Cymru, ac nid oedd ymysg y chwaraewyr a gafodd eu rhyddhau i chwarae i'w rhanbarthau y penwythnos diwethaf a daeth cadarnhad ddydd Llun na fydd wedi gwella mewn pryd i wynebu Ffrainc.

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.