Cytundeb newydd i Ryan Bevington gyda'r Gweilch

Chwaraeodd Bevington ei gêm gyntaf i Gymru yn erbyn y Barbariaid ym Mehefin 2011

Mae prop Cymru Ryan Bevington wedi arwyddo cytundeb newydd gyda'r Gweilch.

Bydd y cytundeb newydd yn ei gadw gyda'r rhanbarth am ddwy flynedd.

Ymunodd Bevington, 25, gyda'r Gweilch yn 2008 ac mae wedi chwarae 97 o weithiau iddyn nhw ers hynny.

Dywedodd y prop, sydd wedi ennill 13 o gapiau i Gymru, bod y penderfyniad i arwyddo yn un hawdd.

"I mi, doedd dim opsiwn arall i'w ystyried," meddai.

"Roeddwn i eisiau aros yma gan fy mod i'n meddwl mai dyma'r amgylchedd gorau i fi a fy uchelgeisiau hirdymor.

"Rydyn ni fel tîm yn uchelgeisiol ac am lwyddo, a dwi'n meddwl y gallwn ni dyfu fel tîm dros y blynyddoedd nesaf gyda'r grŵp o chwaraewyr ifanc sydd yma."

Bevington yw'r diweddaraf o nifer o chwaraewyr i arwyddo cytundebau gyda'r Gweilch, wedi i Alun Wyn Jones, Ashley Beck ac Eli Walker benderfynu aros gyda'r rhanbarth.

Mae'r prop Adam Jones wedi dweud ei fod yn debygol o aros yng Nghymru, ond nid oes sicrwydd os mai gyda'r Gweilch y bydd yn arwyddo, neu ar gytundeb canolog gydag undeb Rygbi Cymru.

Bydd chwaraewyr newydd hefyd yn ymuno â'r tîm y tymor nesaf, gan gynnwys y canolwr Josh Matavesi o Gaerwrangon a Dan Evans o'r Dreigiau.