Torcalon i Donaldson yn Florida

Aeth Jamie Donaldson i'r tywod ar y twll olaf

Gorffennodd y golffiwr o Bontypridd, Jamie Donaldson, yn ail ym Mhencampwriaeth WGC y byd ar gwrs Doral yn Florida nos Sul.

Fe allai pethau fod wedi bod yn well i Donaldson, ond fe ildiodd ergyd ar y twll olaf un i orffen un ergyd y tu ôl i'r enillydd Patrick Reed.

Roedd Reed ddwy ergyd ar y blaen cyn dechrau'r rownd olaf, ac fe gafodd sgôr o 71 ddydd Sul i orffen bedair ergyd yn well na'r safon.

Patrick Reed yn dathlu'r fuddugoliaeth gyda'i wraig

Dyna oedd cyfanswm Donaldson hefyd wrth iddo gyrraedd y twll olaf, ond fe darodd y Cymro ei ail ergyd i'r tywod, ac er gwaethaf ymdrech dda, methodd o 16 troedfedd.

Roedd Donaldson yn gydradd ail gyda Bubba Watson o America.

Dyma'r canlyniad gorau erioed i Donaldson ar gylchdaith y PGA yn America. Cyn ddydd Sul, seithfed oedd ei ganlyniad uchaf.

Y ffefryn ar ddechrau'r pedwerydd diwrnod oedd Tiger Woods wedi iddo sgorio 66 ddydd Sadwrn, ond fe gafodd golffiwr gorau'r byd drafferthion gydag anaf i'w gefn ac fe gafodd rownd o 78 i orffen yn siomedig.

Yr unig ddau arall o Brydain i greu argraff oedd Stephen Gallagher o'r Alban orffennodd un ergyd yn waeth na'r safon, a Graeme McDowell o Ogledd Iwerddon oedd un ergyd y tu ôl i Gallagher.

PENCAMPWRIAETH WGC Y BYD: DORAL, FLORIDA - Canlyniadau :-

1. Patrick Reed (UDA) = -4

=2. Jamie Donaldson (Cymru) = -3

=2. Bubba Watson (UDA) = -3

=4. Richard Sterne (De Affrica) = Par

=4. Dustin Johnson (UDA) = Par