Apêl o'r newydd wedi dwy flynedd

Nid yw Trevor Elias, 77 oed o Abertridwr, wedi cael ei weld ers Ebrill 7, 2012

Mae Heddlu Gwent yn apelio o'r newydd am wybodaeth am ddyn a ddiflannodd union ddwy flynedd yn ôl.

Daeth adroddiadau bod Trevor Elias, 77 oed o Abertridwr ger Caerffili, ar goll ar Ebrill 7, 2012.

Dangosodd ymchwiliad yr heddlu ar y pryd luniau teledu cylch cyfyng ohono yn oriau man y bore cynt, Ebrill 6, yn cerdded heibio'r senotaff yn Senghennydd cyn mynd i gyfeiriad Abertridwr.

Wrth iddo gerdded ar hyd Commercial Street, credir bod tri cherbyd a dyn arall wedi pasio Mr Elias.

Cafodd Mr Elias ei ddisgrifio fel dyn tua 6'0" o daldra ac o gorff main a gwallt byr brown. Mae'n gwisgo sbectol.

Y Ditectif Uwch-arolygydd Ian Roberts sy'n goruchwylio'r ymchwiliad, a dywedodd:

"Ddwy flynedd ymlaen a dydyn ni ddim agosach o ganfod beth ddigwyddodd i Trevor ers iddo gael ei weld ddiwethaf.

"Mae nifer o adolygiadau wedi cael eu cynnal ers iddo fynd ar goll, ac rydym yn gwneud popeth o fewn ein gallu i ddarganfod beth ddigwyddodd iddo.

"Rydym yn apelio ar aelodau'r gymuned i edrych ar y lluniau CCTV ac rwy'n siŵr y bydd rhywun yn adnabod y lluniau o bobl a cherbydau.

"Rydym yn credu bod tri cherbyd wedi ei basio ar y ffordd a bod pobl eraill - dwy fenyw oedd yn cerdded o'i flaen ac un dyn oedd yn cerdded i'r cyfeiriad arall gan ddefnyddio ffôn symudol - wedi ei weld o bosib."

Os oes gan unrhyw un wybodaeth am Mr Elias ar y noson honno neu ers hynny, mae Heddlu Gwent yn gofyn iddyn nhw eu ffonio ar 101.