Bargeinion y brifwyl: tocynnau am £10

Nifer cyfyngedig o'r tocynnau rhataf fydd ar gael

Gyda'r Eisteddfod Genedlaethol yn prysur agosau, mae'r trefnwyr yn cynnig tocynau am £10. Bydd modd prynu tocyn maes ar gyfer oedolyn am £10 a thocyn teulu yn cychwyn o £20.

Y bwriad ydy gwneud y brifwyl sydd yn Sir Gâr eleni mor "fforddiadwy â phosibl" meddai'r Prif Weithredwr, Elfed Roberts.

Ond mae'r eisteddfod yn rhybuddio y bydd angen i bobl brynu'r tocynnau mewn da bryd os ydyn nhw eisiau bargen ac mai nifer cyfyngedig o docynnau sydd ar gael am y prisiau rhataf.

Dywedodd Elfed Roberts: "Bydd y cwsmeriaid mwyaf trefnus yn gallu bachu bargen gwirioneddol, gyda thocynnau Maes oedolion yn cychwyn o £10, a thocynnau teulu'n cychwyn o £20, felly rydym yn annog pobl i fynd ati i brynu'u tocynnau cyn gynted ag y bo modd - bore Mercher os yn bosibl.

"Rwy'n gobeithio y bydd hwn yn gynllun poblogaidd iawn a fydd yn apelio at Eisteddfodwyr o bob oed. Mae hwn, y tocyn wythnos a'r tocyn ieuenctid yn rhan o becyn o gynigion sydd wedi'u creu er mwyn sicrhau bod ein tocynnau a mynediad i'r Eisteddfod mor fforddiadwy â phosibl, ac rwy'n mawr obeithio y bydd ein hymwelwyr yn mynd ati i gymryd mantais o'r bargeinion yma cyn gynted â phosibl."

Tocyn trwy'r theatr

Yn ôl y Prif Weithredwr, maen nhw wedi penderfynu gwneud hyn ar ôl cynnal gwaith ymchwil i'r system tocynnau. Roedd y gwaith yn edrych ar y math o gynigion allai gael eu cynnig i bobl oedd yn dod i'r maes.

Bydd y tocynnau yn dechrau cael eu gwerthu o ddydd Mercher, Ebrill 23, ymlaen, 100 diwrnod cyn dechrau'r brifwyl.

Cafodd y penderfyniad ei wneud yn eisteddfod genedlaethol Sir Ddinbych y llynedd i werthu tocynau 100 diwrnod cyn i'r eisteddfod ddechrau. Un o'r rhesymau oedd bod mwy o bobl yn dewis prynu ar-lein rwan ac yn aros yn hwyrach nes talu am docyn.

Eleni hefyd bydd modd i bobl brynu tocynnau trwy gysylltu gyda'r ddwy theatr leol.

"Datblygiad arall eleni yw bod ein tocynnau am fod ar werth yn Theatrau Sir Gâr am y tro cyntaf, a bydd modd eu prynu ar-lein drwy'r wefan neu wrth fynd i Theatr y Ffwrnes yn Llanelli, y Lyric yng Nghaerfyrddin a'r Miners yn Rhydaman.

"Rydym yn hynod falch bod modd i ni wneud hyn, gan ei fod yn galluogi pobl i bicio i mewn i brynu tocynnau yn uniongyrchol ar adeg sydd orau iddyn nhw."

Bydd modd prynu tocynnau ar lein neu trwy'r ddwy theatr neu trwy ffonio'r llinell docynnau, 0845 4090 800.