Gwahardd dwy ferch o ysgol am oes

Cafodd yr heddlu eu galw i Ysgol Uwchradd Cwmcarn ddydd Iau diwethaf

Mae Cyngor Caerffili wedi cadarnhau fod dwy ferch ysgol gafodd eu harestio ar amheuaeth o gynllwynio i ladd athrawes wedi cael eu gwahardd o'r ysgol am oes.

Cafodd y ddwy - 14 a 15 oed - eu harestio wedi i heddlu gael eu galw i Ysgol Uwchradd Cwmcarn yr wythnos ddiwethaf.

Roedd y rhesymau dros arestio'r ferch 15 oed hefyd yn cynnwys amheuaeth ei bod â chyllell yn ei bag ysgol a'i bod wedi gwneud bygythiadau i ladd.

Bydd y ddwy yn cwblhau eu haddysg mewn uned addysg arbennig.

Dywedodd llefarydd ar ran Cyngor Caerffili: "Gallwn gadarnhau fod dau ddisgybl wedi cael eu gwahardd yn barhaol ac rydym yn asesu eu hanghenion ar hyn o bryd, cyn argymell darpariaeth addysgol briodol ar gyfer y ddwy ferch."

Mae Alison Cray wedi bod yn dysgu yn yr ysgol ers 10 mlynedd

Canmol yr ysgol

Roedd yr athrawes dan sylw, Alison Cray, wedi canmol yr ysgol am y modd y gwnaethon nhw ddelio gyda'r sefyllfa'n gyflym cyn i'r merched ddod yn agos ati.

Cafodd yr heddlu eu galw i'r ysgol ddydd Iau wedi i ddisgyblion eraill glywed y ddwy yn sôn am gynllun i ladd yr athrawes. Daeth y digwyddiad dridiau yn unig wedi llofruddiaeth athrawes mewn ysgol yn Leeds.

Ychwanegodd Gary Thomas, cadeirydd llywodraethwyr Ysgol Uwchradd Cwmcarn: "Fe gafodd pryderon eu tynnu at sylw'r corff llywodraethol ac rydym yn falch o'r modd y deliwyd yn gyflym gyda'r mater gan bawb.

"Mae mesurau clir, polisïau a gweithdrefnau mewn lle i sicrhau bod pawb yn ddiogel.

"Rwy'n falch o'r ysgol, ac yn enwedig y modd y mae disgyblion wedi cael eu haddysgu i fod yn gyfrifol ac adrodd unrhyw bryderon yn syth.

"Hoffwn ddiolch hefyd i'r rhieni am y galwadau cefnogol a phositif yr ydym wedi eu derbyn."