Southall i ddangos cariad at iaith

Fe wnaeth Neville Southall ennill 92 o gapiau rhyngwladol dros Gymru

Bydd y cyn golgeidwad rhyngwladol Nevill Southhall ymhlith yr wyth seleb sydd wedi eu dewis i gymryd rhan yng Nghyfres newydd Cariad@Iaith:Love4Language ar S4C.

Wynebau cyfarwydd arall fydd y canwr John Owen Jones o Borth Tywyn, y ddynes tywydd Behnaz Akghar, ac Ian 'H' Watkins o'r grŵp Steps, un o grwpiau mwyaf poblogaidd y 90au.

Fe fydd yna dair actores sef Jenna Jonathan o Donyrefail, oedd yn un o gast rhaglen deledu realiti MTV The Valleys, Siân Reeves o Lanelli sef aelod o gast gwreiddiol Les Misérables ym 1985 a Suzanne Packer, sy'n enwog fel y cymeriad Tess Bateman o'r gyfres Casualty ac sydd hefyd yn chwaer i'r cyn athletwr Colin Jackon.

Yr olaf o'r wyth sy'n cystadlu yw Sam Evans, Yn 2013 Sam Evans o Lanelli oedd y Cymro cyntaf erioed i ennill y gyfres deledu realiti Big Brother yn 2013.

Dywedodd Sioned Wyn Roberts, Comisiynydd Cynnwys S4C fod yr wyth yn dod o bob math o gefndiroedd gwahanol ac yn enwog mewn meysydd gwahanol iawn i'w gilydd.

Mae Behnaz Akhgar yn wyneb cyfarwydd wrth ddarlledu'r tywydd ar BBC Cymru

"Bydd camerau S4C yn eu dilyn bob cam o'r ffordd ac yn sicr bydd y deunydd yn gwneud teledu gwych! Pob lwc i bob un ohonynt."

Bydd yr wyth yn aros yng Nghanolfan Breswyl Cymraeg i Oedolion, Nant Gwrtheyrn yn Llithfaen ger Pwllheli am wythnos er mwyn mynychu gwersi Cymraeg dwys gyda'r tiwtoriaid Nia Parry ac Ioan Talfryn bob dydd, a chymryd rhan mewn gweithgareddau lu trwy gyfrwng y Gymraeg.

Bydd rhaglen yn cyflwyno'r sêr ar S4C nos Sadwrn 14 Mehefin am 20:00, tra bydd Nia Parry a Matt Johnson yn dod â holl hynt a helynt y sêr ar Cariad@Iaith:Love4Language bob noson rhwng nos Lun 16 Mehefin a nos Wener 20 Mehefin am 20:30 a 21:25.

Bydd y ffeinal yn cael ei ddarlledu ar nos Sadwrn 21 Mehefin am 20:00.