BBC Cymru Fyw

Cludo'r baton ar Faes Eisteddfod yr Urdd

Published
image captionIwan Thomas a'r criw o aelodau'r Urdd yn cludo'r baton ar y Maes

Mae baton Gemau'r Gymanwlad wedi cyrraedd Maes Eisteddfod yr Urdd yn Y Bala ar drydydd diwrnod ei daith trwy Gymru.

Cyn i'r baton fynd o amgylch y Maes fe holodd Cymru Fyw Cledwyn Ashford, cynrychiolydd Cyngor Gemau'r Gymanwlad dros Gymru.

Fe ddywedodd fod Maes Eisteddfod yr Urdd ymysg y mannau gorau i gynnal cymal o'r daith gan fod pobl ifanc mor bwysig i ddyfodol y gemau.

"'Dan ni am i'r genedl ymuno hefo ni a chefnogi tîm Cymru a dathlu pan fyddwn ni'n dychwelyd. Gobeithio y bydd taith y baton yn ein helpu ni i gyrraedd yr uchelgais honno," meddai.

Dywedodd un o drefnwyr yr Eisteddfod Morys Gruffydd: "Mae'n gyfle gwych i ni fel mudiad gefnogi'r tîm Cymreig.

"Ac, wrth gwrs, mae'n brofiad gwych i'n haelodau ni sy'n cario'r baton."

Ras gyfnewid

image copyrightArall
image captionCledwyn Ashford, cynrychiolydd Cyngor Gemau'r Gymanwlad dros Gymru.

Ar ôl y seremoni roedd ras gyfnewid o gwmpas y Maes gyda'r rhedwr 400 metr Iwan Thomas yn dechrau'r ras.

Dywedodd Iwan: "Mae'n wych, dwi'n falch o fod yn rhan o hyn ... bydd y gemau yn yr haf yn ffantastig a dwi'n gobeithio bod y ffaith 'mod i yma yn helpu ychwanegu ychydig o gyffro."

A dywedodd un o'r cludwyr Erin Williams, 15 oed o'r Fflint: "Dyw llawer ddim yn cael y cyfle hwn.

"Dwi'n gobeithio mod i'n ysbrydoli rhai i ymddiddori mewn chwaraeon."

Cafodd y cludwyr eu dewis am eu bod yn gwneud gwaith gwirfoddol gyda'r Urdd ac yn dod o sawl ardal.

Wedi diwrnod cyfan ar Faes yr Eisteddfod bydd y baton yn symud i Sir Gâr a Sir Benfro cyn anelu am Y Fachynlleth a'r gogledd, gan gynnwys Caernarfon, Ynys Môn, Y Rhyl a Rhuthun.

image captionUn o'r cludwyr Erin Williams o'r Fflint: 'yn gobeithio ysbrydoli'

Yn Sir Benfro bydd y baton yn mynd o Balas yr Esgob yn Nhyddewi a drwy dir y gadeirlan, lle bydd yn cael ei fendithio gan Esgob Tyddewi.

Yn Sir Ddinbych bydd y baton yn gorffen cymal Cymreig y daith yn Sir Ddinbych.

Erbyn hynny bydd wedi teithio 731 milltir (1,176 o gilomedrau) o gwmpas Cymru yn ystod yr wythnos.

Straeon perthnasol

  • Y baton yn parhau ar ei daith

    Published
    25 Mai 2014

  • Gemau'r Gymanwlad: Baton y Frenhines wedi glanio

    Published
    24 Mai 2014

  • Gemau'r Gymanwlad: Llwybr Baton y Frenhines

    Published
    23 Mai 2014

Dolenni perthnasol ar y we

Dyw'r BBC ddim yn gyfrifol am gynnwys gwefannau allanol