Record byd i Aled Sion Davies yn yr Eidal

Mae pencampwr disgen Paralympaidd y byd Aled Sion Davies wedi gosod record byd newydd yng nghategori F42.

Wrth gystadlu yn Grosetto yn yr Eidal, torrodd y Cymro yr hen record o 47.85m gyda thafliad o 48.78m.

Cyrhaeddodd Davies yr Eidal yn hwyr nos Wener ar ol iddo fod yn rhan o daith Baton y Frenhines yng Nghymru yn gynharach yn yr wythnos.

"Mae wedi bod yn ddiwrnod hir i fi, ond dwi dal wedi llwyddo i dorri record byd," meddai.

"Dwi'n hapus iawn gyda hynny. Mae'n braf cael gwybod hyd yn oed gyda'r blinder, mae llawer mwy y gallaf wneud.

"Dwi'n edrych ymlaen at dorri 50m eleni. Dwi'n sicr y gallaf wneud. Dwi wedi gwneud wrth hyfforddi. Mater o berfformio pan mae'n cyfri' yw hi."