Gor-boethi wedi lladd tri milwr ar Fannau Brycheiniog

Bu farw Craig Roberts, Edward Maher a James Dunsby yn dilyn yr ymarferiad ym mis Gorffennaf

Mae gwrandawiad arbennig cyn y cwest i farwolaeth tri milwr ar Fannau Brycheiniog yr haf diwethaf wedi clywed bod y tri wedi marw oherwydd gor-boethi.

Roedd y milwyr yn cymryd rhan mewn ymarferiad yr SAS ar Fannau Brycheiniog ar 13 Gorffennaf y llynedd wrth i'r tymheredd gyrraedd 29.5C.

Bu farw'r Is-gorporal Craig Roberts, 24, yn ystod yr ymarferiad a chafodd Edward Maher a James Dunsby, y ddau yn 31, eu cludo i'r ysbyty. Mi fuodd y ddau farw yn ddiweddarach.

Yn ystod y gwrandawiad yn Solihull fe ddaeth i'r amlwg bod organau Corpral Dunsby wedi methu.

Clywodd y gwrandawiad hefyd y bydd penderfyniad cyn diwedd y mis a fydd dau aelod o'r lluoedd arfog yn cael eu herlyn am ddynladdiad ai peidio o ganlyniad i'r marwolaethau.

Fe fydd gwrandawiad arall yn cael ei gynnal yn Birmingham ym mis Awst cyn i'r cwest llawn ddechrau.