£2,500 am gam-ddeiagnosis
- Cyhoeddwyd
Mae dynes wedi cael £2,500 wedi iddi dderbyn diagnosis o strôc pan roedd hi'n dioddef o diwmor ar yr ymennydd.
Fe gafodd y ddynes 45 oed ei gweld yn Ysbyty Brenhinol Morgannwg ger Llantrisant yn 2009 ac fe gafodd cyfleoedd i ddarganfod y canser eu methu dro ar ôl tro am dros flwyddyn.
Mae'r corff oedd yn gyfrifol am ei gofal - Bwrdd Iechyd Cwm Taf - wedi ymddiheuro.
Dywedodd yr Ombwdsmon Gwasanaethau Cyhoeddus ar gyfer Cymru y dylai'r ddynes fod wedi cael apwyntiad i weld niwrolegydd neu i gael sgan MRI ynghynt.
Fe ddaeth yr ombwdsmon i'r casgliad bod methiannau yn y ffordd cafodd ei hachos ei thrin.
Pe byddai hi wedi derbyn diagnosis yn gynharach mi fyddai hyn wedi rhoi sicrwydd iddi am ei chyflwr ac wedi arwain at ffyrdd i drin ei symptomau a llethu'r boen roedd hi'n ei ddioddef.
Roedd rhywrai wedi "cymryd yn ganiataol" ei bod hi wedi cael ei chyfeirio a'i bod hi'n aros i weld arbenigwr, ond yn hytrach roedd hi wedi cael ei gyrru am adolygiad o'i hiechyd meddwl.
Y rheswm am hyn oedd bod cred ei bod hi'n dioddef o gyflwr seicosomatig.
Mae Bwrdd Iechyd Cwm Taf yn dweud bod gwersi wedi cael eu dysgu.
Dywedodd llefarydd ar eu rhan: "Rydym wedi rhoi system newydd yn eu lle ar gyfer monitro cyfeiriadau rhwng clinigwyr ac rydym yn parhau i gymryd rhan mewn datblygu systemau electroneg..."