Llofrudd Antigua wedi dianc o'r carchar

Cafodd Avie Howell ei garcharu am lofruddio Ben a Catherine Mullany yn 2008

Mae dyn gafodd ei garcharu am oes am ladd cwpl o dde Cymru yn Antigua wedi dianc.

Fe wnaeth Avie Howell a dyn arall, Kaniel Martin, saethu Ben a Catherine Mullany, y ddau yn 31 oed, o Bontardawe yng Ngorffennaf 2008.

Roedd y ddau ar ddiwrnod olaf eu mis mêl yn Antigua.

Bu farw Mrs Mullany yn syth wedi iddi gael ei saethu yn y bwthyn oedd yn rhan o'r gwesty.

Anafwyd ei gŵr yn ddifrifol a chafodd ei gludo yn ôl i Gymru cyn marw wythnos yn ddiweddarach.

Dywed heddlu Antigua fod Howell wedi dianc ddydd Iau ar ôl dringo wal 30 troedfedd (9 m).

Llwyddodd i ddianc gyda dyn arall oedd yn wynebu achos llys ar gyhuddiadau o dwyll.

Cafodd Ben a Catherine Mullany eu saethu ar eu mis mêl yn Antigua

Dywedodd llefarydd ar ran yr heddlu: "Fe wnaeth Avie Howell ddianc o Garchar Ei Mawrhydi ynghyd â charcharor arall Kenroy Laurie Marshall.

"Mae'n debyg iddynt ddefnyddio offeryn i dori twll mewn rhan o rwyll a dringo dros wal 30 troedfedd."

Dywedodd Sarisant Raymond Finley ei fod yn credu bod Howell yn parhau ar yr ynys.

Cafodd Howell a Martin eu dyfarnu'n euog o lofruddio Mr a Mrs Mullany yn 2011.

Dywedodd Peter Hain, AC Castell-nedd: "Rwy'n credu ei fod yn holl bwysig fod Howell yn cael ei ddal a'i roi yn ôl yn y carchar - a hynny ar frys. Fe wnaeth o gyflawni llofruddiaeth erchyll o gwpl ifanc oedd a gymaint i roi i'r gymuned leol.

"Mae'n anhygoel i feddwl fod y dyn yma a'i draed yn rhydd."