BBC Cymru Fyw

Milwr yn achub dynes oedd yn cael ei boddi

Published
image copyrightMedia Wales
image captionFe ymosodwyd ar Leanne Ware ar Chwefror 16

Fe redodd milwr i mewn i afon i achub dynes oedd yn cael ei boddi gan ddau ddyn.

Clywodd Llys y Goron Caerdydd bod y Capten Mark Gold, 43 oed, gyda'i deulu ar lan Afon Taf yng nghanol y ddinas pan welodd Leanne Ware, 31 oed, yn y dŵr.

Fe wnaeth lwyddo i fynd heibio'r ymosodwyr a thynnu ei chorff diymadferth glas o'r afon a gyda chymorth meddyg oedd yn cerdded heibio fe wnaethon nhw lwyddo i achub ei bywyd.

Mae partner Miss Ware, Martin Edwards, 43 oed, o Gaerdydd a'i ffrind Gary Pincott, 55 oed, o'r Barri, yn gwadu ceisio llofruddio.

Clywodd y llys fod Capten Gold, a fu'n aelod o Adran Feddygol y Fyddin am 20 mlynedd, yn cerdded gyda'i wraig a'i blant ar Chwefror 16 pan welodd ddau ddyn yn gwthio corff i'r afon a dal ei phen o dan y dŵr.

'Ymosod arni'

Eglurodd John Philpotts, ar ran yr erlyniad bod y Capten Gold yn cerdded ar hyd pont yr afon pan welodd Miss Ware yn gorwedd ar lan yr afon gyda'r ddau ddiffynydd yn ymosod arni.

Dywedodd iddo droi i ffwrdd er mwyn symud ei deulu a ffonio 999.

"Pan wnaeth o ddychwelyd gwelodd y ddau yn gwthio Miss Ware i'r afon, Mr Edwards yn ei rowlio hi gyda'i draed a Mr Pincott yn ei gwthio gyda'i ddwylo," meddai wrth y rheithgor.

"Mae'n ymddangos nad oedd Miss Ware yn gwbl ymwybodol wrth iddi rowlio i mewn i Afon Taf ac yn syth aeth o dan y dŵr o'r golwg."

Rhedodd Capten Gold i lawr a mewn i'r dŵr rhewllyd i chwilio amdani pan gafodd ei daro yn ei wyneb gan Mr Edwards.

'Wyneb o dan dŵr'

Yn y llys fe ddywedodd Mr Philpotts bod Capten Gold wedi cyrraedd Miss Ware a bod hi'n ymddangos bod Mr Edwards yn dal ei hwyneb o dan y dŵr.

Clywodd y rheithgor bod Miss Ware yn las a doedd hi ddim yn ymateb a bod y Capten Gold a'r meddyg teulu Hannah Hetherington, a oedd yn loncian ar y pryd, yn credu ei bod wedi marw.

Fe wnaeth y ddau roi triniaeth achub bywyd iddi hyd nes i'r parafeddygon gyrraedd.

Clywodd y llys bod Mr Edwards wedi dweud wrth yr heddlu, "Pam wnes i ei thynnu yn ôl os oeddwn i'n ei llofruddio?"

Ac mewn cyfweliad gyda'r heddlu dywedodd Mr Pincott wrth blismones: "Hei cariad, roeddwn i ar y bont pan oedd Martin a Leanne oddi tano yn dadlau.

"Dwi ddim wedi gwneud dim byd."

Mae'r achos yn parhau.