Canabis: Tad i 12 o blant yn osgoi carchar
Image copyright
BBC news grab
Fe wnaeth dyn 47 oed osgoi cael ei garcharu am gyflenwi canabis am mai fo oedd unig ofalwr ei 12 plentyn.
Dywedodd Peter Saunders wrth Lys y Goron Yr Wyddgrug bod ei blentyn ieuengaf yn 19 mis oed ond bod ei wraig wedi ei adael a phriodi rhywun arall.
Mae plant Saunders yn 19 mis oed, tri, chwech, saith, naw, 10, 12, 13, 14, 15, 18 a 22.
Dydi Saunders, o Stryd y Dywysoges yn Y Rhyl, ddim wedi gweithio am 10 mlynedd oherwydd salwch a bu'n ddibynnol ar fudd-daliadau.
Fe wnaeth Saunders, a'i fab hynna', Matthew Saunders (22 oed), oedd yn byw mewn fflat yn yr un stryd a'i dad, gyfadde' i fod â canabis yn eu meddiant gyda'r bwriad o gyflenwi.
Roedd yr heddlu wedi cynnal cyrch ar eu cartrefi ar Ragfyr 17 2013.
'Hynod ddifrifol'
Derbyniodd y ddau ddiffynnydd, wnaeth gyrraedd y llys mewn car Jaguar du, ddedfrydau o garchar wedi eu gohirio.
Dywedodd y Barnwr Rhys Rowlands bod Peter Saunders yn honni ei fod yn ysmygu canabis fel poen laddwr am fod ganddo boen yn ei draed o ganlyniad i glefyd siwgr.
"Dydi hynny ddim yn ei atal rhag gwneud pethau corfforol eraill," meddai.
Ond y diffynnydd oedd unig ofalwr ei blant ifanc ac mae'r Llys Apêl yn ei gwneud yn gwbl amlwg y byddai rhaid iddo wneud trosedd "hynod ddifrifol" er mwyn ei anfon i'r carchar.
Fe ddywedodd y barnwr ei fod yn rhoi budd y plant ifanc gyntaf ac yn erbyn ei ewyllys doedd dim modd anfon ei fab i'r carchar am iddo yntau bledio'n euog i'r fenter ar y cyd.
Cafodd y ddau 12 mis o garchar wedi ei ohirio am ddwy flynedd.
Bydd yn rhaid i'r tad wisgo tag am dri mis ac aros yn ei gartref rhwng 8 yh a 6 yb a bydd rhaid i'r mab fod o dan oruchwyliaeth a mynychu cynllun adferiad cyffuriau a mynychu'r llys yn fisol.
'Defnydd personol'
Wrth erlyn dywedodd y bargyfreithiwr Nicholas Sefton bod yr heddlu wedi canfod canabis mewn dau le - un yng nghanol yr anrhegion Nadolig - a oedd yn cynnwys 43 gram o'r cyffur gyda gwerth tua £450.
Roedd 'na un gram yn fflat y mab gyda'r ddau yn dweud ei fod ar gyfer defnydd personol.
Ond roedd negeseuon ar ffôn y mab yn datgelu y byddai pobl yn cysylltu gyda fo drwy negeseuon personol ar Facebook yn gofyn am gyffuriau.
Dywedodd y barnwr bod hi'n ymddangos bod y mab yn dweud wrth y cwsmeriaid i fynd i gartref ei dad "a allai eu helpu".
Rhybuddiodd y barnwr y byddai'r ddau yn cael eu carcharu os fyddan nhw'n troseddu eto ac na ddylai ddefnyddio'r plant fel amddiffyniad i osgoi carchar.