Dadorchuddio tyrbin tanddwr yn Sir Benfro

Cafodd y generadur ei adeiladu yn Noc Penfro

Bydd generadur sy'n cael ei bweru gan donau'r môr yn cael ei ddadorchuddio yn Sir Benfro yn ddiweddarach heddiw.

Fe fydd y tyrbin tanddwr yn cael ei leoli ar Swnt Dewi a bydd yn gweithio am gyfnod prawf o 12 mis gan gyflenwi trydan i dai yn Nhyddewi.

Yn ôl prif weinidog Cymru, Carwyn Jones mae'r prosiect yn garreg filltir bwysig yng nghyd-destun ynni gwyrdd.

Yn ôl Tidal Energy, cwmni o Gaerdydd, maen nhw'n gobeithio bydd yr arbrawf yn arwain at gynllun ehangach fydd yn cynnwys naw tyrbin.

Cafodd y ddyfais 150 tunnell ei adeiladu yn Noc Penfro gan Mustang Marine yn arbennig ar gyfer yr arbrawf yma.

Bydd y ddyfais, sydd yr un taldra ac adeilad saith llawr, yn cynhyrchu ynni wrth ddefnyddio pŵer tonau ar wely'r môr.

Yn ôl Tidal Energy, y DeltaStream fydd y ddyfais gyntaf yng Nghymru fydd yn defnyddio ynni'r môr ac wedi ei gysylltu gyda'r grid cenedlaethol

Dywedodd Martin Murphy, rheolwr gyfarwyddwr y cwmni, fod y generadur yn "garreg filltir sylweddol" ac yn "gweld geni'r diwydiant ynni mor yng Nghymru. "

Mae'r cwmni yn awyddus i godi naw tyrbin tanddwr oddi ar arfordir Penmaen Dewi

Bydd y prif weinidog yn dadorchuddio'r tyrbin mewn seremoni ddydd Iau.

"Mae hwn yn brosiect o bwys i Gymru, sydd nid yn unig yn ein helpu i gyrraedd ein targedau ynni cynaliadwy, ond a fydd hefyd yn creu cyfleodd i bobl a busnesau lleol," meddai Mr Jones.

O fewn wythnosau mae disgwyl i'r ddyfais 400kW fwydo'r Grid Cenedlaethol, gan gyflenwi ynni i gartrefi yn Nhyddewi.

Mae'r prosiect wedi derbyn £8 miliwn o gronfa'r Undeb Ewropeaidd.

Yn y pendraw mae'r cwmni yn gobeithio codi naw tyrbin oddi ar Benmaen Dewi, gan gyflenwi tua 10,000 o gartrefi.