BBC Cymru Fyw

Tony Pulis yn gadael Crystal Palace

Published
image copyrightGetty Images
image captionMae Tony Pulis wedi gadael Crystal Palace

Mae'r Cymro Tony Pulis wedi gadael ei swydd fel rheolwr Crystal Palace a hynny 48 awr yn unig cyn dechrau'r tymor newydd yn yr uwchgynghrair.

Bu tensiynau mawr rhwng Pulis, sy'n 56 oed, a chadeirydd Crystal Palace, Steve Parish.

Y tymor diwethaf fe wnaeth Pulis, cyn rheolwr Stoke, ennill gwobr rheolwr y flwyddyn yn yr uwchgynghrair.

Ond roedd y Cymro yn anhapus ag anallu Palace i ddenu, neu gynnig digon o arian i ddenu, chwaraewyr newydd.

'Gwneud mwy i'w gadw'

Dywedodd y sylwebydd a'r cyn chwaraewr rhyngwladol, Malcolm Allen, ar raglen Dylan Jones ar Radio Cymru fod yr anghytuno wedi dechrau diwedd y tymor diwethaf.

Ychwanegodd iddo siarad â rai o staff hyfforddi'r clwb fore Gwener.

"Roedd o eisiau dod â chwaraewyr newydd i mewn ar £40,000 neu £50,000 yr wythnos a dydi hynny ddim yn mynd i ddigwydd yn Crystal Palace.

"Oedd o wedi gwneud mor dda- a chael bonws o dros £1 miliwn y llynedd - ond doedd hwnna ddim yna blwyddyn yma.

"On i'n meddwl byddai Palace wedi rhoi cytundeb newydd iddo, mwy o bres neu beth bynnag, a gwneud mwy i'w gadw o - ond mae yna fwy i'r stori na jyst rhoi bai ar gadeirydd Crystal Palace.

"Dwi'n llawn parch iddo (Pulis) - does ru'n o'i dimau wedi disgyn. Ond dyn ei hun ydi Tony Pulis ac os oedd o'n meddwl nad oes ganddo llawer o siawns i aros yn y Premiership mae o'n mynd i fynd. "

Y rheolwr cynorthwyol, Keith Millen, fydd yn gyfrifol am y tîm ar gyfer y gêm yn erbyn Arsenal ddydd Sadwrn.

Pwy nesaf?

Enwau posibl sydd wedi eu crybwyll i olynu Pulis, yw cyn rheolwr Caerdydd, Malky Mackay a chyn rheolwr Manchester United ac Everton, David Moyes.

Un o'r rhai sy'n gyfrifol am ddenu chwaraewyr newydd i Palace ydi Iain Moody, oedd a rôl debyg yng Nghaerdydd cyn iddo gael ei ddiswyddo gan Vincent Tan.