Awema: Rheithgor yn parhau i drafod

Mae Naz Malik yn gwadu tri chyhuddiad o dwyll

Mae rheithgor achos y gŵr sydd wedi ei gyhuddo o dwyllo elusen ar gyfer lleiafrifoedd ethnig yn parhau i drafod eu dyfarniad.

Mae cyn bennaeth Awema Naz Malik, 65 oed, wedi gwadu tri chyhuddiad o dwyll sy'n ymwneud â thaliadau o fwy na £15,000.

Roedd y Barnwr Peter Heywood wedi dweud bod yr achos wedi bod yn un anodd ei grynhoi.

Mae'r erlyniad yn honni bod y diffynnydd wedi defnyddio dwy siec wedi eu harwyddo ac yn werth £12,000 i leihau ei ddyled bersonol.

Mae cyhuddiad arall yn ymwneud â chynllun taliadau yswiriant.

Mae Mr Malik yn mynnu fod yr arian wedi ei ddefnyddio i dalu costau dilys.