Y chwilio'n parhau am Isaac Nash, 12 oed
- Cyhoeddwyd
Mae Heddlu'r Gogledd wedi enwi'r bachgen 12 oed sydd ar goll ers iddo gael ei ysgubo gan y llanw i'r môr ger Aberffraw ar Ynys Môn bnawn ddoe.
Roedd Isaac Nash, sy'n dod o ardal Huddersfield, ar wyliau gyda'r teulu ar y pryd.
Roedd wedi bod yn chwarae yn y môr gyda bachgen arall pan aethon nhw i drafferthion ac fe geisiodd rhai o aelodau'r teulu eu hachub.
Mae tair o fadau achub gwylwyr y glannau wedi bod yn chwilio amdano ers 7.30 bore Sadwrn, ond wedi rhoi'r gorau iddi tra bod llanw uchel. Fe fyddan nhw'n ailddechrau am 18.30.
Mae swyddogion hefyd yn archwilio glannau'r arfordir ynghŷd ag aelodau'r teulu a gwirfoddolwyr lleol.
Mae hofrennydd heddlu'r Gogledd yn helpu gydag archwiliad timau Gwylwyr y Glannau o Rosneigr, Cemaes a Bangor.
Fe fydd tîm arbenigol, tanddwr, yn ymuno yn ystod oriau llanw uchel.
Mynd i drafferthion
Dydd Gwener, cafodd criwiau badau achub yr RNLI eu galw o Borthdinllaen, Caergybi a Bae Trearddur ar ôl adroddiadau fod dyn a bachgen 12 oed wedi eu hysgubo i'r môr ger Aberffraw tua 12.30.
Llwyddodd y dyn i gyrraedd y lan.
Roedd timau gwylwyr y glannau o Rosneigr, Moelfre, Bangor a Chaergybi yn helpu gyda'r gwaith chwilio yn ogystal â hofrennydd yr Awyrlu o'r Fali a hofrennydd yr heddlu.
Wedi chwilio'r môr a'r arfordir, bu'n rhaid i'r timau achub, y badau a'r hofrennyddion roi'r gorau i'r chwilio nos Wener am y tro.
Dywedodd llefarydd ar ran Gwylwyr y Glannau fod yr amodau yn rhai anodd iawn gan bod y môr mor stormus.
Yn ôl y llefarydd, roedd y bachgen 12 oed a bachgen 5 oed, yn padlo pan aeth y ddau i drafferthion.
Aeth tad a thaid i'w hachub. Cafodd y bachgen pump oed ei achub ond cafodd y bachgen arall ei ysgubo i'r môr.
Dywedodd Dave Brewer, rheolwr gwylwyr y glannau Môn, ei fod o'n deall fod tad i un o'r bechgyn wedi llwyddo i afael yn ei fab, tra bod y taid wedi ceisio gafael yn y bachgen arall.
"Fe aeth y taid i geisio achub y bachgen arall ac fe wnaeth ton ysgubo drosto. Fe lwyddodd i afael ar y creigiau ond collodd ei afael ar y bachgen."
Cafodd bad achub RNLI Bae Trearddur ei lansio o fewn tri munud i dderbyn galwad brys, gyda bad achub pob tywydd Porthdinllaen yn cael ei lansio yn fuan wedyn.
Credir bod y teulu ar wyliau yn yr ardal ac yn dod o Ogledd Lloegr.