Y chwilio yn parhau am Isaac Nash

Roedd Isaac Nash, o ardal Huddersfield, ar wyliau gyda'i deulu pan aeth i drafferthion yn y môr.

Mae Heddlu'r Gogledd wedi cadarnhau eu bod yn parhau i chwilio am fachgen aeth ar goll oddi ar arfordir Ynys Môn ddydd Gwener.

Cafodd Isaac Nash, 12, ei ysgubo allan i'r môr yn Aberffraw wrth chwarae gyda ffrind yn y dŵr.

Mae Gwylwyr y Glannau yn cynorthwyo'r heddlu i chwilio am y pedwerydd diwrnod.

Dywedodd yr heddlu bod tîm deifio a hofrennydd hefyd wedi bod yn chwilio dros y penwythnos.

Roedd teulu Isaac wedi helpu yn y chwilio ddydd Sadwrn, ond dywedodd yr heddlu eu bod wedi dychwelyd i'w cartref yn ardal Huddersfield erbyn hyn.

Ddydd Sul, roedd y chwilio yn canolbwyntio ar yr ardal rhwng Aberffraw ac Ynys Llanddwyn.