Cwpan Capital One: Canlyniadau nos Fawrth
- Cyhoeddwyd
Yng nghwpan Capital One nos Fawrth, roedd 'na fuddugoliaeth i Abertawe ar y Liberty wrth iddyn nhw guro Everton 3-0.
Ond mae taith Caerdydd yn y gystadleuaeth ar ben wrth iddyn nhw golli adref yn erbyn Bournemouth.
Fe drechodd Bournemouth yr Adar Gleision 3-0.
Ar y Liberty, fe sgoriodd yr Elyrch wedi i Nathan Dyer fanteisio ar rediad gwych Jefferson Montero ar yr asgell chwith.
Gylfi Sigurdsson sgoriodd ail gôl Abertawe, a daeth y drydedd ym munudau ola'r gêm gan yr eilydd, Marvin Emnes.
Siom i Gaerdydd
Er mai'r un oedd y sgôr yn Stadiwm Dinas Caerdydd, doedd yr Adar Gleision ddim yn canu.
Roedd hi'n noson ddigalon i Gaerdydd, wrth iddyn nhw adael y bencampwriaeth yn y drydedd rownd.
Fe sgoriodd Dan Gosling ddwy gôl i Bournemouth, a Charlie Daniels gafodd y drydedd.
Does gan Gaerdydd ddim rheolwr wedi ymadawiad Ole Gunnar Solskjær, ac yn ôl un o'r rhai sy'n gofalu am y clwb dros dro, Scott Young, roedd neithiwr yn fwy na siomedig.
"Dyw e jysd ddim digon da i Glwb Pêl-droed Caerdydd," meddai.
