Cyngor Casnewydd yn gwrthod cynllun uno

Mae Cyngor Casnewydd wedi gwrthod cynllun i uno'n wirfoddol â Chyngor Sir Fynwy.

Fe bleidleisiodd cynghorwyr yn erbyn argymhelliad Comisiwn Williams, sydd eisiau cwtogi nifer yr awdurdodau lleol o 22 i 10 neu 12.

Fe ddywedodd llefarydd ar ran y cyngor fod aelodau'n teimlo'n "gryf iawn" bod angen i'r ddinas gadw ei hunaniaeth ei hun.

Ond wnaethon nhw ddim diystyru cyd-weithio gyda chynghorau eraill - petai hynny'n fuddiol i drigolion.

Fe wnaeth holl bleidiau'r cyngor bleidleisio yn erbyn y cynllun, a bydd yr awdurdod nawr yn anfon ymateb ffurfiol at lywodraeth Cymru.