Cyhuddo llanc o ladrata wedi i bensiynwraig gael ei hanafu

Mae'r heddlu wedi cyhuddo llanc 15 oed o ladrata, wedi digwyddiad yn Abertawe, pan gafodd dynes 93 oed ei hanafu'n ddifrifol.

Cafodd yr heddlu eu galw i'r tŷ ar St Christopher Drive, Cilá, am 10:30 fore Llun.

Fe gafodd y ddynes oedrannus ei chludo i Ysbyty Treforys, Abertawe, lle mae hi mewn cyflwr difrifol iawn.

Wedi i'r heddlu ddechrau ymchwilio i'r digwyddiad, daeth yn amlwg fod 'na ladrad wedi bod yn y tŷ, a chafodd llanc 15 oed ei arestio ddydd Mawrth.

Mae disgwyl i'r llanc fynd o flaen ynadon yn Abertawe fore dydd Mercher.