Gobaith i ganolfannau hamdden
- Cyhoeddwyd
Gall dyfodol dwy o ganolfannau hamdden gogledd Cymru fod yn fwy diogel pe bai cynghorwyr yn rhoi cymeradwyaeth i gynlluniau ddydd Mawrth.
Fe wnaeth Canolfan Nova ym Mhrestatyn gau ym mis Chwefror, ar ôl i gyngor Sir Ddinbych roi'r gorau i roi arian i ymddiriedolaeth oedd yn gyfrifol am reoli'r safle.
Nawr mae'r cyngor yn trafod gwario £4.2 miliwn, gan greu caffi newydd ac ystafell ffitrwydd.
Hefydd ddydd Mawrth bydd cynghorwyr Wrecsam yn trafod dyfodol Plas Madoc, a chynllun i drosglwyddo rheolaeth i ymgyrchwyr lleol.
Adnoddau o safon
Byddai cynlluniau ar gyfer Canolfan Nova yn cadw'r pwll nofio 25 metr ac yn gwella'r ystafelloedd newid.
Yn ogystal â chaffi byddai'r datblygiad hefyd yn cynnwys lle chwarae i blant.
Mae yna fwriad hefyd i atgyweirio to'r adeilad a sefydlu tair uned manwerthu ar y prom.
Dywedodd Jamie Groves, pennaeth hamdden Sir Ddinbych: "Rydym am ddatblygu adnoddau o'r safon gorau, a bydd hynny yn ei dro yn annog pobl i wneud ymarfer corff."
Roedd y cyngor yn arfer rhoi arian i ymddiriedolaeth Clwyd Hamdden. Roedd yr ymddiriedolaeth yn gyfrifol am reoli Canolfan Nova, Heulfan y Rhyl a Chanolfan Bowls Gogledd Cymru.
Ond bu'n rhaid i'r dair ganolfan gau yn gynharach eleni, ar ôl i'r cabinet ddweud na fydda nhw'n rhoi £200,000 ar gyfer 2014/15.
Fe wnaeth Clwyd Hamdden roi'r gorau i fasnachu ym mis Chwefror.
Mae'r Cyngor wedi penderfynu na fydd Heulfan y Rhyl yn ailagor, oherwydd y byddai costau adnewyddu'n rhy ddrud.
Fe wnaed gwaith i'r ganolfan fowls dros yr haf, ac mae'r ganolfan wedi ailagor.
Yn y cyfamser mae'r ymgyrchwyr sydd am achub Canolfan Hamdden Plas Madoc yn aros i gael prydles y safle.
Byddant hefyd yn derbyn cymhorthdal o £50,000 gan gyngor Wrecsam.
Cafodd Plas Madoc yn Acrefair ei gau ym mis Ebrill, fel rhan o becyn i geisio arbed arian.
Bydd cynghorwyr Wrecsam yn gwneud penderfyniad ar ddyfodol y ganolfan ddydd Mawrth.
Straeon perthnasol
- Cyhoeddwyd27 Ebrill 2014
- Cyhoeddwyd27 Mai 2014
