Ched Evans: Sheffield 'yn dal i drafod'

Mae Evans wedi ennill 13 cap i Gymru a sgorio un gôl

Mae Sheffield United yn "parhau i drafod eu penderfyniad hirdymor am Ched Evans" wedi iddo gael ei ryddhau o'r carchar.

Ym mis Ebrill 2012, cafodd Evans, 25 oed, ei ddedfrydu i bum mlynedd dan glo wedi i reithgor ei gael yn euog o dreisio menyw mewn gwesty yn Y Rhyl.

Fe gafodd ei ryddhau o garchar Wymott ddydd Gwener wedi hanner ei ddedfryd.

Ddydd Sadwrn, roedd erthygl yn The Sun yn honni fod y Cymro wedi cael cynnig cytundeb am ddwy flynedd.

Ond yn ôl y clwb, mae'r adroddiad hwnnw "yn gamarweiniol ac andwyol".

Fe ymunodd Evans â Sheffield United o Manchester City yn 2009.

Wedi iddo gael ei ganfod yn euog, wnaeth y clwb ddim adnewyddu ei gytundeb ddiwedd y tymor hwnnw.

Mae disgwyl i Evans wneud "datganiad personol iawn" ar ei wefan yr wythnos hon.

Mae mwy na 150,000 o bobl wedi arwyddo deiseb yn annog Sheffield United i beidio â'i gymryd yn ôl.

Fe ddywedodd rheolwr y clwb, Nigel Clough wrth BBC Radio Sheffield ddydd Mercher: ""Rydan ni wedi trafod y mater a'r perchnogion fydd yn penderfynu.

"Mae'n fater sydd uwchben lefel pêl-droed. Os yw'n dychwelyd byddwn ni (staff hyfforddi) yn penderfynu os y bydd yn chwarae ai peidio."