Pryder Unsain am effaith toriadau Cyngor Caerdydd

Image copyright MJ Richardson

Image caption Mae undeb Unsain yn dal i drafod gyda Chyngor Caerdydd.

Dydy undeb Unsain heb ddweud na i weithredu diwydiannol wedi iddyn nhw rybuddio Cyngor Caerdydd y bydd y toriadau o £32m yn arwain at "ganlyniadau difrifol".

Mae cyngor mwyaf Cymru yn ceisio delio â diffyg o £48m ac y gallai hyn arwain at golli swyddi, llai o wasanaethau hamdden, a thoriadau i wasanaethau gofal ac iechyd

Fe allai godi treth cyngor 5% hefyd yn 2015-16, ac arbed £5m mewn costau cyflogaeth.

Mae undeb Unsain yn dweud eu bod yn parhau i weithio gyda'r cyngor sydd yn wynebu "sialenau ariannol sylweddol".

Yn ôl trefnydd rhanbarthol undeb Unsain, Steve Belcher, bydd pobl yn ddig oherwydd hyd a lled y toriadau, allai weld goleuadau stryd yn cael eu diffodd a diwedd i ariannu dathliadau Calennig y Brifddinas.

Dywedodd nad ydi'r undeb wedi gadael y bwrdd trafod eto ond bod gweithredu diwydiannol yn bosibilrwydd.

"Dydy o ddim yn rhywbeth y byddem yn dymuno amdano ond yn y pen draw, weithiau, mae'n rhywbeth mae'n rhaid ei ystyried."

Arbedion posib

• Ailstrwythuro gwasanaeth llyfrgell (arbed £283,000)
• Gwasanaeth Ieuenctid, gan gynnwys codi am gynllun Gwobrau Dug Caeredin (£1,250,000)
• Arlwyo - codi pris cinio ysgol 20c yn 2015 a 10c ychwanegol yn 2017 (£300,000)
• Colli 13 o swyddi parciau a hamdden (£329,000)
• Cau'n barhaol y toiledau cyhoeddus sydd ar hyn o bryd ar gau dros dro (£53,000)
• Cofi ffioedd claddu ac amlosglu (£200,000)
• Torri ac addasu gwasanaethau bysiau (£236,000)
• Biniau sbwriel llai neu casglu'n llai aml (£267,000)

Mae'n bosib mai gofal iechyd a chymdeithasol fyddai'n derbyn yr ergyd galetaf gyda £7.9m yn cael ei dorri o'r adran hon, yn ôl adroddiad fydd yn cael ei ystyried gan gabinebt y Cyngor ddydd Iau.

Ar ben y toriadau, mae'r cyngor yn anelu at arbedion effeithlonrwydd o £2m a chodi £13m ychwanegol.

Mae'r adroddiad yn dweud "ei fod yn debygol y bydd diswyddiadau o fewn gweithlu'r cyngor," a'r gred yw y byddai'r ffigwr dros 20 o bobl.

'Penderfyniadau anodd'

Os yw'r cabinet yn cytuno â'r cynlluniau, fe fyddant yna yn ymgynghori â'r cyhoedd.

Yn ôl y Cynghorydd Graham Hinchey: "Does dim dwywaith bod .. penderfyniadau anodd o'n blaenau. Rydym wedi ymroi i gydweithio gyda staff, yr undebau a chymunedau lleol drwy'r ymgynghoriad.