Gatland yn enwi'r tîm

Liam Williams Image copyright Huw Evans picture agency
Image caption Ar y fainc bydd Liam Williams wedi perfformiad da yn erbyn Fiji

Mae Warren Gatland wedi cyhoeddi'r tîm i wynebu Seland Newydd yn Stadiwm y Mileniwm ddydd Sadwrn.

Mae'r 15 bron yn union yr un fath a'r tîm fu'n herio Awstralia ar 8 Tachwedd heblaw bod Jonathan Davies yn dychwelyd i'r canol, gyda George North yn symud nôl i'r asgell a Liam Williams yn disgyn i'r fainc.

Bydd y penderfyniad yna yn siom i Williams, a oedd yn seren y gêm ym marn llawer yn erbyn Fiji ddydd Sadwrn diwethaf.

Ymysg y blaenwyr mae Richard Hibbard yn ôl fel bachwr, er gwaetha' anghydfod gyda'r tîm hyfforddi dros y penwythnos - fe benderfynodd Hibbard chwarae i'w glwb Caerloyw pan nad oedd ar ddyletswydd rhyngwladol.

Dywedodd hyfforddwr cynorthwyol Cymru Rob Howley ddydd Llun bod yr anghydfod wedi'i ddatrys yn dilyn sgwrs rhwng Hibbard a Gatland.

Ar ôl bod yn gapten yn erbyn Fiji, mae Gethin Jenkins allan o'r garfan gydag anaf, ac mae Rhys Webb a Dan Biggar (sydd wedi gwella o anafiadau) yn disodli Mike Phillips a Rhys Priestland fel hanneri.

Mae Priestland wedi ei adael allan o'r garfan yn gyfan gwbl.

Image copyright Getty Images

'Penderfyniad anodd'

Wrth gyhoeddi'r 15, dywedodd Warren Gatland:

"Mae e'r un tîm bron a chwaraeodd yn erbyn Awstralia ac mae'n hwb cael rhai yn ôl wedi anafiadau.

"Mae'n un o'r timau mwyaf profiadol i ni ddewis. Mae rhai penderfyniadau wedi eu gorfodi arnom ni: mae gan Gethin Jenkins anaf i gyhyr, dyw Bradley Davies ddim wedi ymarfer ers deuddydd ac fe gafodd Liam Williams anaf bach i'w ffêr - roedd hwnna'n benderfyniad anodd, ond fe fydd e ar y fainc.

"Rydym yn disgwyl perfformiad clinigol gan y Crysau Duon - rhaid i ni gymharu o ran ymosod ac angerdd."

Cymru v. Seland Newydd: Stadiwm y Mileniwm, dydd Sadwrn, 22 Tachwedd:

Olwyr: Leigh Halfpenny (Toulon), Alex Cuthbert (Gleision), Jonathan Davies (Clermont Auvergne), Jamie Roberts (Racing Metro), George North (Northampton Saints), Dan Biggar (Gweilch), Rhys Webb (Gweilch);

Blaenwyr: Paul James (Caerfaddon), Richard Hibbard (Caerloyw), Samson Lee (Scarlets), Jake Ball (Scarlets), Alun Wyn Jones (Gweilch), Dan Lydiate (heb glwb), Sam Warburton (Gleision, CAPT), Taulupe Faletau (Dreigiau).

Eilyddion: Scott Baldwin (Gweilch), Nicky Smith (Gweilch), Rhodri Jones (Scarlets), Luke Charteris (Racing Metro), Justin Tipuric (Gweilch), Mike Phillips (Racing Metro), James Hook (Gloucester), Liam Williams (Scarlets).

Straeon perthnasol

Cysylltiadau Rhyngrwyd

Dyw'r BBC ddim yn gyfrifol am safleoedd rhyngrwyd allanol.