Bar Cofi Roc a chlwb nos K2 yn cau y penwythnos hwn
- Cyhoeddwyd
Mae bar Cofi Roc a chlwb nos K2 yng Nghaernarfon yn cau'r penwythnos hwn.
Dywedodd y perchnogion fod ffactorau fel gwahardd smygu a newid yr oriau trwyddedu wedi effeithio ar y diwydiant clwb nos.
"Mae 'na lai'n mynd allan, llai o gwsmeriaid a hyn yn golygu mwy o bwysa," meddai'r Cynghorydd Ioan Thomas, un o'r rhai adnewyddodd yr adeilad bron 20 mlynedd yn ôl a'i droi'n glwb nos y Paradox.
Newidiodd yr enw i K2 cyn i Cofi Roc, bar caffi, agor ar Y Maes.
Penderfynodd cyfranddalwyr geisio gwerthu'r busnes yn Awst ac maen nhw wedi penderfynu dirwyn popeth i ben "am resymau masnachol".
'Yn ffantastig'
Ers blynyddoedd mae nifer o fandiau Cymraeg, Cymreig a Saesneg wedi perfformio yno.
"Mae cefnogaeth pobl leol wedi bod yn ffantastig, yn enwedig cwsmeriaid y dydd," meddai Ioan.
"Ac mae 'na lawer o botensial yn yr adeilad a'r busnes ... ond mae angen rhywun ifanc, rhywun efo gweledigaeth newydd.
"Dyw hwn ddim yn gyfnod da ... mae'r diwydiant wedi mynd lawr ers 2000."