Crabb yn cwrdd ag arweinwyr crefyddol

Mae Ysgrifennydd Gwladol Cymru, Stephen Crabb, yn cyfarfod ag arweinwyr Moslemaidd ac Iddewig yn ne Cymru ddydd Iau.

Yn ystod ei ymweliad, bydd yn trafod bygythiadau gan eithafwyr, a chynlluniau llywodraeth y DU i weithio gyda chymunedau i daclo'r broblem.

Roedd y cyfarfod wedi ei gynllunio cyn y digwyddiadau diweddar ym Mharis.

Ddydd Mercher, fe ddywedodd Mr Crabb wrth Aelodau Seneddol: "Fe gawson ni safiad anhygoel a phwerus o undod ar y nos Sul yn dilyn yr ymosodiadau ym Mharis, pan safodd Rabbi Michael Rose ac arweinydd Cyngor Moslemaidd Cymru law yn llaw i gefnogi gwerthoedd rhyddid yng Nghymru."