Gwobrau'r Selar 2015
- Cyhoeddwyd
Ywain Gwynedd, Candelas a Sŵnami oedd prif enillwyr Gwobrau'r Selar a gynhaliwyd yn Aberystwyth nos Sadwrn.
Dyma'r drydedd flwyddyn i gylchgrawn Y Selar gynnal digwyddiad i ddathlu llwyddiant cerddoriaeth gyfoes Gymraeg.
Cipiodd cyn ganwr Frizbee, Ywain Gwynedd, dair gwobr sef 'Artist Unigol Gorau', 'Cân Orau' am y trac 'Neb ar Ôl', a 'Record Hir Orau am ei albwm unigol cyntaf Codi/Cysgu.
Gadawodd Sŵnami gyda dwy wobr - 'Record Fer Orau' am eu sengl ddwbl 'Cynnydd / Gwenwyn', a 'Fideo Gorau' am 'Gwenwyn'.
Roedd yn noson llwyddiannus hefyd i Candelas, oedd yn cloi'r noson, wrth iddyn nhw gipio gwobrau 'Gwaith Celf Gorau' ac efallai prif deitl y noson, 'Band Gorau'.
Parti Cofiadwy
Daeth canoedd o bobl ynghyd i ddathlu gyda'r enillwyr, ac mae'r trefnwyr yn teimlo fod Gwobrau'r Selar eleni wedi bod yn ddigwyddiad cofiadwy unwaith eto.
Dywedodd Uwch Olygydd Y Selar, Owain Schiavone: "A hithau'n drydedd flwyddyn i ni gynnal Gwobrau'r Selar fel digwyddiad byw, does dim amheuaeth ei fod wedi cydio yn nychymyg pobl, a bod yr artistiaid a'r gynulleidfa'n gweld hwn fel un o uchafbwyntiau cerddorol y flwyddyn.
"Mae'r ffaith mai'r gynulleidfa sy'n dewis yr enillwyr yn y bleidlais gyhoeddus yn golygu bod ganddyn nhw berchnogaeth dros yr holl beth a dwi'n credu bod hynny'n ffactor amlwg yn llwyddiant y digwyddiad.
"Unwaith eto eleni roedd nifer o fysus yn llawn o bobl yn teithio i Aber, ac mae'n arwydd da iawn bod criwiau o bobl ifanc yn fodlon teithio o Ynys Môn, Caerdydd, Sir Benfro a thu hwnt er mwyn dod i ddigwyddiad fel hwn"
Rhestr lawn enillwyr Gwobrau'r Selar:
Record Fer Orau - Cynnydd / Gwenwyn - Sŵnami
Cân Orau - Neb ar Ôl - Ywain Gwynedd
Gwaith Celf Gorau - Bodoli'n Ddistaw - Candelas
Hyrwyddwyr Gorau - 4 a 6
Cyflwynydd Cerddoriaeth Gorau - Lisa Gwilym
Artist Unigol Gorau - Ywain Gwynedd
Digwyddiad Byw Gorau - Maes B, Eisteddfod Llanelli
Fideo Cerddoriaeth Gorau - Gwenwyn - Sŵnami
Record Hir Orau - Codi /Cysgu - Ywain Gwynedd
Band neu Artist Newydd Gorau - Ysgol Sul
Band Gorau - Candelas
Offerynnwr Gorau - Lewis Williams (Sŵnami / Candelas)