£20m i hybu dysgu drwy'r celfyddydau
- Cyhoeddwyd
Bydd £20 miliwn yn cael ei wario ar gynllun Dysgu Creadigol drwy'r Celfyddydau.
Ddydd Mawrth, bydd cynllun gweithredu'r ymgyrch yn cael ei gyhoeddi, er mwyn amlinellu sut y bydd dysgwyr yng Nghymru yn ymwneud â'r celfyddydau.
Dyma ymateb Llywodraeth Cymru a Chyngor Celfyddydau Cymru i adolygiad annibynnol yr Athro Dai Smith, Y Celfyddydau mewn Addysg yn Ysgolion Cymru.
Cyngor Celfyddydau Cymru fydd yn gyfrifol am roi'r cynllun ar waith drwy weithio â phartneriaid yn y consortia addysg rhanbarthol, awdurdodau lleol a sefydliadau ac ymarferwyr ym maes y celfyddydau.
Tri nod
Tri nod yn bennaf sydd i'r cynllun gweithredu Dysgu Creadigol drwy'r Celfyddydau:
- gwella cyrhaeddiad drwy greadigrwydd;
- cynyddu a gwella cyfleoedd mewn ysgolion ym maes y celfyddydau;
- cefnogi athrawon ac ymarferwyr y celfyddydau i ddatblygu eu sgiliau er mwyn sicrhau gwell deilliannau i ddysgwyr.
Mae'r cynllun yn cefnogi tair blaenoriaeth Llywodraeth Cymru ym maes addysg: gwella llythrennedd a rhifedd a lleihau effaith tlodi ar gyrhaeddiad.
Bydd pedwar rhwydwaith rhanbarthol yn cael eu sefydlu i rannu arferion gorau, annog gweithio mewn partneriaeth a chynnig cyfleoedd hyfforddi ar gyfer sefydliadau celfyddydol a diwylliannol er mwyn teilwra'r hyn sydd ganddynt i'w gynnig i fodloni anghenion ysgolion a'r cwricwlwm.
'Tanio ein dychymyg'
Dywedodd y Gweinidog Addysg, Huw Lewis:
"Mae'r celfyddydau yn tanio ein dychymyg, yn ein hysbrydoli a'n helpu ni i ddatblygu sgiliau newydd.
"Rydw i am weld pobl ifanc, yn enwedig o gefndiroedd llai breintiedig, yn cael y cyfle i fanteisio ar brofiadau celfyddydol a chreadigol o safon uchel mewn ysgolion yng Nghymru."