Arweinydd cyngor mwya Cymru'n ennill pleidlais o hyder

Phil Bale
Image caption Goroesi: Phil Bale

Mae arweinydd Llafur Cyngor Caerdydd Phil Bale wedi ennill pleidlais o hyder yn ei arweinyddiaeth.

Y gwrthbleidiau oedd wedi galw am y bleidlais ar ôl i Mr Bale gael ei orfodi i wneud newidiadau munud olaf i'w gyllideb yr wythnos diwetha er mwyn sicrhau mwyafrif.

Roedd Llafur wedi rhybuddio y byddai cynghorwyr Llafur yn wynebu camau disgyblu pe baen nhw'n pledleisio yn erbyn Mr Bale.

Roedd angen i saith o gynghorwyr Llafur "newid ochr" er mwyn i'r gwrthbleidiau ennill y bleidlais.

Yn falch

Dywedodd Mr Bale ei fod yn falch o'r hyn yr oedd wedi ei gyflawni. "Dwi'n credu yn y brifddinas, ei phobl, ei busnesau a'i dyfodol," meddai.

Y cynghorydd Ceidwadol Craig Williams gyflwynodd y cynnig gerbron y cyfarfod.

"Mae effaith niweidiol wedi bod ar y ddinas," meddai, "oherwydd grŵp Llafur rhanedig.

"Rhaid iddyn nhw uno o gwmpas eu harweinydd neu ddod o hyd i un newydd."

Roedd arweinydd y Democratiaid Rhyddfrydol Judith Woodman wedi dweud bod proses y gyllideb "yn fethiant llwyr."

Straeon perthnasol