Owain Tudur Jones yn ymddeol o bêl-droed

Mae'r chwaraewr pêl-droed canol cae Owain Tudur Jones wedi cyhoeddi ei fod yn ymddeol.

Yn wreiddiol o Fangor, roedd wedi bod ar lyfrau Abertawe a Norwich cyn symud i chwarae yn yr Alban.

Enillodd saith o gapiau rhyngwladol a thri chap i'r tîm dan 21 oed.

Dywedodd y chwaraewr 30 oed ei fod yn ymddeol o'r gêm oherwydd anaf i'w ben-glin.

Pan symudodd i'r Alban arwyddodd i Inverness Caledonian Thistle a Hibernian cyn symud i Falkirk.

"Es i weld y llawfeddyg mis Hydref, yn anffodus ers y cyfnod yna doedd y pen-glin ddim i weld yn gwella.

"Digwyddodd yr anaf diweddara rhyw ddiwrnod cyn i mi droi yn 30, roedd yn rhai penderfynu'r ffordd orau o symud ymlaen.

Uchafbwynt

"Os o ni eisiau byw yn holliach byddai'n well rhoi'r gorau iddi."

Dywedodd fod o a'i deulu yn edrych ymlaen at symud yn ôl i gyffiniau Bangor, a bod ei blant eisoes wedi setlo yn Ysgol y Garnedd.

"Does yna ddim brys o ran be dwi am wneud nesa, ond o bosib bod y wasg a'r cyfryngau yn rhoi cyfle, ond rwy'n agored at rywbeth."

Dywedodd mai ei uchafbwynt fel chwaraewr oedd cynrychioli ei wlad.

"Mae anafiadau wedi cael lot o effaith ar fy ngyrfa ond mae'n rhaid edrych yn bositif, mae chwarae dros fy ngwlad saith o weithiau yn rhywbeth i edrych nôl efo gwen ar fy wyneb.

"Bydd y capiau efo fi am byth. Roedd hefyd yn bleser bod yn rhan o'r carfanau wnaeth lwyddo cael dyrchafiad ac yn brofiadau bydd rhywun yn ei gofio byth bythoedd."