Carchar i ddyn am geisio llofruddio ei bartner
- Cyhoeddwyd
Mae dyn wedi ei garcharu am oes am geisio llofruddio ei bartner yng Nghaerdydd.
Fe dorrodd Nigel Roach, 49 oed, i mewn i gartref Christine Lewis yn Llanrhymni fis Awst diwethaf a cheisio ei thrywanu gyda dwy gyllell, cyn iddo gael ei ddiarfogi gan yr heddlu.
Dywedodd Ms Lewis, 48 oed, wrth Lys y Goron Caerdydd: "Roeddwn yn meddwl ei fod yn mynd i fy lladd."
Wrth siarad ar ôl yr achos, dywedodd yr heddlu fod Ms Lewis bod drwy gyfnod o "ddioddefaint gwirioneddol ofnadwy".
Clywodd y llys fod Roach wedi ceisio llofruddio ei bartner o 16 mlynedd, ar ôl gweld negeseuon testun gan gydweithiwr gwrywaidd.
Cafodd Ms Lewis anafiadau i'w hysgwydd, ei braich, ei brest a'i dwylo yn ystod yr ymosodiad.
Dywedodd Roach wrth y rheithgor mai'r unig beth oedd yn ceisio ei wneud, oedd "dangos rhywfaint o boen" i Ms Lewis, ac nid oedd ganddo unrhyw fwriad i'w lladd hi.
Bydd Roach yn y carchar am o leiaf wyth mlynedd a hanner.
Ar ôl yr achos, dywedodd y Ditectif Rhingyll Chris Grey o Heddlu De Cymru: "Mae Christine yn fenyw hynod ddewr ac wedi mynd trwy gyfnod o ddioddefaint gwirioneddol ofnadwy.
"Rwy'n gobeithio y bydd y ddedfrydu heddiw yn dod â rhyw fath o derfyn ar gyfnod anodd iddi hi a'i theulu."