Ulster 36-17 Gleision

Ruan Pienaar Image copyright Getty Images

Aeth Ulster ar y blaen wedi dim ond tri munud, diolch i gais gan Craig Gilroy, a llwyddodd Ruan Pienaar gyda'r trosiad.

Nid oedd dechrau perffaith Ulster i barhau'n hir, wrth i Nick Williams dderbyn cerdyn melyn a chael ei anfon i'r gell cosb.

Gydag ychydig dros 10 munud o'r gêm wedi'i chwarae, gadawodd Rhys Patchell y cae gydag anaf i'w ben.

Ac aeth pethau o ddrwg i waeth i'r Gleision wrth i Pienaar ychwanegu tri phwynt arall i gyfanswm Ulster, cyn i Louis Ludik groesi am ail gais y tîm cartref.

Llwyddodd Pienaar gyda chic gosb arall, cyn diwedd yr hanner cyntaf, i wneud y sgôr yn 18-0 ar yr egwyl.

A chychwynnodd yr ail hanner, yn union yr un fodd, wrth i Pienaar ychwanegu tri phwynt arall i gyfanswm Ulster.

Ond, o'r diwedd, llwyddodd y Gleision i sgorio eu pwyntiau cyntaf, gyda chic gosb gan Gareth Anscombe a chais gan Tom Isaacs.

Sgoriodd Alex Cuthbert ail gais yr ymwelwyr, cyn i Pienaar ychwanegu tri phwynt arall i gyfanswm Ulster.

Pum munud cyn diwedd y gêm llwyddodd Ludik gyda thrydydd cais i'r tîm cartref, cyn i Paul Marshall ychwanegu'r pedwerydd, gan sicrhau buddugoliaeth Ulster.