Streic trenau i barhau
- Cyhoeddwyd
Dywed cynrychiolwyr undeb fod trafodaethau munud olafgyda First Great Western (FGW) wedi methu a bydd eu haelodau yn mynd ar streic.
Bydd aelodau Undeb y Rheilffordd, Morwrol a Thrafnidiaeth (RMT)yn dechrau'r streic 48 awr am 18:30 ddydd Mercher.
Fe ddaw hyn yn dilyn cynlluniau i gael gwared â rhai swyddogion a cherbydau bwffe ar drenau newydd yr Hitachi Inter City Express gan FGW, fydd yn cael eu cyflwyno yn 2017.
Pe bai'r streic yn mynd ei blaen, byddai'r trenau i Lundain yn rhedeg bob awr yn hytrach na bob 30 munud, a bydd gwasanaethau i Ddyfnaint a Chernyw bob dwy awr yn hytrach na phob awr.
Dywedodd llefarydd ar ran yr RMT: "Mae safiad y cwmni yn gwbl annerbyniol....mae yna dal amser i newid natur a chynllun y trenau newydd."
'Siomedig'
Mae disgwyl i'r gweithredu diwydiannol gael effaith fawr ar deithwyr sy'n mynychu ail ddiwrnod y gêm griced rhwng Lloegr ac Awstralia yng nghyfres y Lludw yng Nghaerdydd ddydd Iau.
Fe bleidleisiodd 80% o weithwyr RMT dros gefnogi streic.
Dywedodd rheolwr gyfarwyddwr FGW Mark Hopwood mai 41% o aelodau RMT sy'n gweithio i'r cwmni bleidleisiodd o blaid y cam hwn.
Ategodd: "Rydym yn siomedig bod ein haddewid dros sicrwydd swyddi - sef yr angen am fwy, nid llai o staff - ac ein hymrwymiad i gynnal yr un cyflogau ac amodau i staff yr effeithir arnynt - heb eu clywed."