Adnabod corff Cymro aeth ar goll ar Ynys Wyth
- Cyhoeddwyd
Roedd Michael Davies ar ei wyliau ar Ynys Wyth pan aeth ar goll
Daeth cadarnhad ddydd Mawrth mai corff pensiynwr o Flaenau Gwent aeth ar goll ar Ynys Wyth oedd y corff gafodd ei ddarganfod mewn cors ar yr ynys.
Roedd Michael Davies, 71 oed o'r Blaenau, wedi bod yn aros mewn gwesty gyda'i wraig pan ddiflannodd ar 26 Mai.
Roedd y cwpl wedi teithio i dref Sandown ar yr ynys ar fws.
Mae Heddlu Hampshire wedi cadarnhau bod archwiliad post mortem yn cael ei gynnal ac mae teulu Mr Davies wedi eu hysbysu am y datblygiad.
Nid yw ei farwolaeth yn cael ei drin fel un amheus.
Cafodd ei gorff ei ddarganfod yn ardal Sandown o'r ynys, yn dilyn archwiliadau gan swyddogion arbenigol, cŵn, a gwirfoddolwyr.