Adroddiad: Cynllun taclo trais alcohol yn 'gadarnhaol'
Mae prosiect atal troseddau treisgar sy'n gysylltiedig ag alcohol mewn dinasoedd yn "gadarnhaol," yn ôl adroddiad.
Heddlu De Cymru sy' wedi bod yn targedu yfwyr a staff bariau yng Nghaerdydd ac Abertawe.
O'r rhai gafodd eu holi, mae 54% yn lle 63% yn yfed y ddiod gadarn cyn mynd allan ac mae 36% yn lle 46% yn credu ei bod yn anodd cael hwyl heb fod yn feddw.
Dywedodd adroddiad Canolfan Iechyd y Cyhoedd fod y canlyniadau hyn yn "galonogol iawn".
Mae Dirprwy Gomisiynydd Heddlu De Cymru, Sophie Howe, wedi dweud bod yr adroddiad yn "hanfodol i'n helpu ac yn nodi sut y gallwn ni wneud hyd yn oed fwy wrth fynd i'r afael â goryfed."
Anghyfreithlon
Cafodd yr ymgyrch ei lansio yn ystod Pencampwriaeth y Chwe Gwlad a bydd yn para drwy gydol y flwyddyn gyda'r cam nesaf yn digwydd pan fydd y myfyrwyr yn dychwelyd i'r brifysgol.
O staff y bariau gafodd eu holi, roedd 61% yn gwybod ei bod yn anghyfreithlon gweini alcohol i rywun sydd eisoes wedi meddwi tra oedd 48% o'r blaen.
Dywedodd prif awdur yr adroddiad, Zara Quigg, fod y sefyllfa yn "hynod o galonogol".
"Fodd bynnag," meddai, "mae angen mwy o ymyrraeth fel y bydd rhagor o ganlyniadau o'r fath."