BBC Cymru Fyw

Toriadau i S4C yn 'bygwth' swyddi medd Leanne Wood

Published
image copyrightS4C
Byddai toriadau i gyllideb S4C yn tanseilio diwydiant sydd yn cynnal canoedd o swyddi yng Nghymru, yn ôl arweinydd Plaid Cymru, Leanne Wood.
Wrth siarad yn yr Eisteddfod Genedlaethol ym Meifod, galwodd Ms Wood am ddiogelu'r sianel ac am ddatganoli grymoedd dros ddarlledu i Gymru.
Dywedodd Leanne Wood fod rhagleni S4C a'r sylw i fywyd Cymru wedi dioddef wedi toriadau i gyllideb y sianel yn 2010.
Mae llywodraeth y DU wedi dweud ei fod wedi ei "ymrwymo" i ddarlledu Cymreig.
Mae S4C - sydd yn derbyn y rhan fwyaf o'i arian gan y BBC - wedi clywed fod disgwyl i'r sianel ddod o hyd i "arbedion rhesymol" fel rhan o gytundeb ar y drwydded deledu gafodd ei gyhoeddi ym mis Gorffennaf.
Yn ôl ffigurau yn adroddiad blynyddol S4C roedd y gost y pen am bob gwyliwr wedi gostwng o £1.36 yr wythnos yn 2009 i 85c yr wythnos yn 2014/15.
Dywedodd Ms Wood fodd ffawd y sianel yn "enghraifft berffaith o'r hyn sydd yn digwydd pan fod darlledu yng Nghymru yn cael ei adael yn nwylo Llundain".
Ddydd Llun fe wrthododd llywodraeth y DU awgrym Prif Weinidog llywodraeth Cymru Carwyn Jones nad oedd yn poeni am ddarlledu yng Nghymru.
image copyrightLeanne Wood
image captionFe wnaeth Leanne Wood ei sylwadau ar faes yr Eisteddfod ym Meifod