Rhybudd biniau Cyngor Caerdydd
- Cyhoeddwyd
Mae cannoedd o gartrefi yng Nghaerdydd wedi derbyn rhybudd am roi'r math anghywir o wastraff allan ar gyfer casgliadau ysbwriel ar ôl i reolau newydd gael eu cyflwyno.
Dywed y cyngor fod 1,460 o negeseuon rhybudd wedi eu dosbarthu ers i'r newidiadau ddod i rym ar 27 Gorffennaf.
Yn ôl llefarydd fe fydd trigolion yn cael eu dirwyo os ydyn nhw'n parhau i dorri'r rheolau.
Cafodd y rhan fwyaf o'r negeseuon rhybudd -361- eu dosbarthu yn ardal Glan yr Afon, gyda nifer uchel hefyd yn Adamsdown a Grangetown
Hyd yma ni chafodd unrhyw rybuddion eu dosbarthu yn ardaloedd Tre-biwt, Cathays, Y Tyllgoed, Gabalfa, Yr Eglwys Newydd a Thongwynlais.
Dywedodd llefarydd ar ran Cyngor Caerdydd: "Nid ydym yn bod yn llawdrwm gan fod yna raglen o addysgu yn cyd-fynd â'r broses orfodi. Mae yna griw ychwanegol o swyddogion yn gweithio gyda chriwiau arferol, a hefyd yn cynnig cefnogaeth i drigolion.
"Ond er mwyn i ni gyrraedd y targedau ailgylchu statudol mae'n rhaid i drigolion gydymffurfio â'r drefn newydd. Bydd y rhai sydd ddim yn gwneud hyn yn wynebu dirwy.
Mae'n rhaid i bob cyngor yng Nghymru ailgylchu 58% o'u gwastraff erbyn Mawrth 2016 neu wynebu dirwyon llym.