'Llawer mwy' yn cael trafferth talu treth cyngor

banknotes
Image caption Mae treth y cyngor wedi codi tua 4% yn ystod y flwyddyn ddiwethaf

Mae nifer y bobl yng Nghymru sy'n cael trafferth talu treth y cyngor wedi codi 51% mewn 12 mis, yn ôl adroddiad.

Erbyn hyn mae dros 6,000 wedi cael trafferthion, yn ôl Canolfan Cyngor ar Bopeth, a hon yw'r broblem dyled fwyaf yn y wlad.

Mae treth y cyngor wedi codi tua 4% yn ystod y flwyddyn ddiwethaf.

Dywedodd Cymdeithas Llywodraeth Leol Cymru eu bod yn gwneud eu gorau i sicrhau bod y rhai mwyaf bregus yn cael eu gwarchod.

2,000 o gartrefi

Ond mae'r adroddiad wedi dweud bod beilïaid wedi ymweld â 2,000 o gartrefi'r llynedd i gasglu treth cyngor.

Dywedodd llefarydd o'r mudiad: "Ar adeg o lymder dydi hi ddim yn syndod bod niferoedd y cartrefi sy'n cyfeirio at broblemau talu treth cyngor wedi codi.

"Ond ar gyfartaledd mae biliau yma £160 yn llai nag yn Lloegr."