BBC Cymru Fyw

DNA yn helpu dal lleidr o Abertawe

Published
image copyrightSouth Wales Police
image captionKristian Dee Evans

Cafodd lleidr o ardal Abertawe ei ddal ar ôl gadael darn o gig eidion wedi ei hanner bwyta.

Clywodd llys fod Heddlu De Cymru wedi dod o hyd i Kristian Dee Evans ar ôl iddo adael tystiolaeth DNA.

Roedd wedi torri mewn i fflat myfyriwr o Hong Kong ar Heol Rodney yn Abertawe a dwyn ces yn llawn o ddillad ac esgidiau.

Fe gymerodd y cig o gegin y fflat ond ei adael wedi ei hanner bwyta.

Yn Llys y Goron Abertawe cafodd Evans, 33 oed o Orseinon, ei garcharu am dair blynedd.