Ymgeiswyr Llafur yn ceisio cefnogaeth

Cyhoeddwyd
Ffynhonnell y llun, Jeff Overs/BBC
Disgrifiad o’r llun,
Yvette Cooper, Jeremy Corbyn, Liz Kendall ac Andy Burnham

Mae dau o'r ymgeiswyr ar gyfer arweinyddiaeth y blaid Lafur, Andy Burnham a Liz Kendall, yn ymweld â Chymru ddydd Sul, wrth geisio cefnogaeth aelodau'r blaid.

Fe fydd Mr Burnham yn cymryd rhan mewn sesiwn holi ac ateb gydag aelodau'r blaid yn Wrecsam.

Bydd y cyfarfod yn cael ei gadeirio gan Lesley Griffiths AC, Gweinidog Cymunedau a Threchu Tlodi Cymru.

Fe fydd Ms Kendall yn mynd â'i hymgyrch hi i Gaerdydd.

Fe wnaeth y ddau ymgeisydd arall yn y ras - Yvette Cooper a Jeremy Corbyn - ymweld â Chymru yr wythnos diwethaf.

Bu Ms Cooper yng Nghei Connah ar Lannau Dyfrdwy ddydd Gwener, gan bwysleisio'r angen am greu swyddi o sgiliau uchel.

Roedd Mr Corbyn yng Nghymru dydd Llun a dydd Mawrth, yn pwysleisio ei neges gwrth lymdra.

Daeth 1,000 o gefnogwyr i'w weld mewn rali yng Nghaerdydd.

Fe gafodd y papurau pleidleisio eu dosbarthu i aelodau ddydd Gwener.

Fe fydd rhaid i bleidleiswyr roi rhif wrth bob un o'r pedwar ymgeisydd yn ôl eu dewis, gyda'r canlyniad yn cael ei gyhoeddi ar 12 Medi.