Cordina yn cipio medal aur

Cyhoeddwyd
Ffynhonnell y llun, Getty Images
Disgrifiad o’r llun,
Joe Cordina

Mae'r Cymro Joe Cordina wedi ennill medal aur yng nghystadleuaeth pwysau ysgafn ym Mhencampwriaeth Bocsio Ewrop yn Bwlgaria.

Fe wnaeth y bocsiwr 23 oed o Gasnewydd, wnaeth ennill medal efydd yn Gemau'r Gymanwlad y llynedd, guro Otar Eranosyan o Georgia ar bwyntiau.

Bu'n rhaid i Cordina wrthsefyll tactegau Eranyosan oedd am ymladd yn agos.

Fe lwyddodd i wneud hynny a hefyd taro'n ôl a sicrhau penderfyniad unfrydol i gipio'r aur.

"Rwy'n meddwl fy mod yn haeddu'r fuddugoliaeth. Fe fethodd o a glanio unrhyw ergydion da arnaf.

"Rwyf wedi bod yn gweithio'n galed iawn dros gyfnod o dri mis ac am hynny mae'r diolch am y fedal aur."

Mae perfformiad Cordina yn golygu ei fod wedi sicrhau u lle ym Mhencampwriaethau'r Byd yn Qatar ym mis Hydref - lle bydd o'n ymgeisio am le yn nhîm Prydain ar gyfer y gemau Olympaidd yn Rio.